إليك يا من كنت يوما رئيس

 يا من كنت يوما رئيس
كان من المفروض أكتب الخطاب ده يوم 13 أبريل ... يوم ما شعبك قرر انه يحاكمك
بس الحدث كان اكبر مني ومن مشاعري
كنت بفكر أنا ممكن أقولك إيه
بس الأول أحب أعرفك بنفسي
أنا بنت مصرية عادية
عمري 23 سنة
اتولدت لما كنت حضرتك بقالك سبع سنين بس بتحكم مصر
كنت كل يوم باشوف وشك أكتر من ما باشوف وشي في المراية
أفتح تليفزيونك ألاقي أول خبر عنك
أقرأ جرايدك تطالعني طلعتك البهية
أنزل الشارع ألاقي أهلك بيبايعوك
أدخل المدرسة ألاقي اسمك متعلق على اليافطة اللي فوق باب المدرسة
أدخل أوضة المدير ألاقي صورتك وراه
في كتب المدرسة اتعلمت انك الأب والزعيم والقائد
وفي كتب التاريخ معرفتش حاجة عن حرب أكتوبر غير الضربة الجوية
 ثلاثة وعشرون عاما يا من كنت يوما رئيس
عمري كله عشت أسبح بحمدك
عمري كله وأنا أرى الكل يدور في فلكك
وعلى رأي هشام الجخ
علمونا في المدارس لما الناظر ييجي نقول قيام
بس معلموناش الاحترام
عشان كده ما تزعلش لما أقول الشعب يريد اسقاط النظام
مقلتهاش من فراغ والله
ولا نكران للجميل
قلتها لما شفت المصريين بياكلوا من الزبالة
وشفت غلابة الدويقة بتدك رؤسهم تحت جبل المقطم
وغلابة العبارة بيموتوا هدر في البحر
وشباب بلدي بيموتوا في شواطيء ايطاليا
وشفت ألف من ولاد بلدي بيموتوا عشان قالوا للظلم لا
غلطتك إني درست في مدرستك حديث شريف
بيقول كلكم راع ومسئول عن رعيته
والحاكم راع ومسئول عن رعيته
وقالولنا في الكتب انك الحاكم
فمتزعلش لما اقولك انك مسئول عن رعيتك
وانك لما خذلت رعيتك
لازم رعيتك يخذلوك
قبل الختام
ملقتش غير كلماتك تكون مسك الختام
ان الوطن باق والأشخاص زائلون...ومصر العريقة هي الخالدة أبدا
ومصر الباقية قالت كلمتها
مصر الباقية قالت انك ظلمت
وحان وقت الحساب
وفي الختام
ولابد من يوم معلوم
تترد فيه المظالم
أبيض على كل مظلوم
اسود على كل ظالم
اسود على كل ظالم
وسيعلم الذين ظلموا أي منقلب ينقلبون
من مصرية حلمت هتفت يوما باسقاطك

هو إيه اللي حصل امبارح؟؟؟

هو اللي اللي حصل؟؟
مين ضرب مين؟؟
ومين ولع في مين؟؟
ما احنا كنا ماشيين زي الفل
والمليونية شغالة
الجمعة اللي فاتت جابت رجل عزمي وسليمان
وبتاعة امبارح كانت هتجيب الباقيين
حصل إيه بقى؟؟؟
ليه حاسة اننا فقدنا المؤشر؟؟
الضباط اللي نزلوا امبارح دول عملوا إيه؟؟
الناس سألوهم... مطالبكم إيه؟؟
قالوا احنا مطالبنا هي مطالبكم
طب لما الحكاية كده لابسين ميري ليه
البسوا مدني
حصلت كتير قوي على فكرة
اللي حصل امبارح بعد ما معظم الناس مشيت
ان المجموعة دي من الضباط قالوا احنا قاعدين عشان لو روحنا هيودونا ورا الشمس
فالناس انقسمت
ناس قالت مالناش دعوة دول هم مسئولين طالما نزلوا بالبدل العسكرية
وناس الشهامة أخدتهم وقالت لا يا جدعان دول مش ممكن يكونوا خونة دول مضحيين بحياتهم ومستقبلهم معانا ولازم نحميهم زي ما عملنا مع شومان
وناس تالتة مش عارفة تعمل إيه
طب أنا عندي اسئلة دلوقتي
أول سؤال للضباط المعتصمين: انتوا ايه فايدة اللي انتوا عملتوه؟؟؟ ضريتو نفسكم وضريتوا الثورة والثوار وما انهيتوش الفساد اللي بتقولوا عليه... وكمان بتحتموا بالمدنيين العزل وعاوزينهم يحموكوا؟؟ أمال انتوا ضباط على نيلة إيه؟؟
سؤالي التاني للجيش: ليه العنف؟؟ ليه ضرب النار على المعتصمين العزل؟؟ عاوزين تجيبوا الضباط ماشي بس لسه العنف؟؟؟ ليه يعني اللي مات وال 71 المصابين دول ذنبهم إيه؟؟
ولما انتوا عارفين من الأول إن فيه ضباط نازلين الميدان وقلتوا الكلام ده بالحرف لنوارة نجم لما كلمتكم ليه ما حاولتوش تقدروا البلاء قبل وقوعه؟؟
بجد مظاهرات الجمعة بتعمل تأثير كبير وبتكون آداة ضغط سلمية على صناع القرار عشان نحمي الثورة.. ليه تقلبوها لمصادمات داخلية بين ضباط الجيش؟؟ وليه نحتمي بالمدنيين العزل المطحونين أساسا؟؟
دي شهادة أحد الناس اللي كانت موجودة هناك.. ربنا يستر
طبعا كلنا دلوقتي نسينا احنا بنطالب بإيه
وطبعا لأول مرة في حياتي أقول إن "فلول الحزب" مالهاش دعوة بالليلة دي وإنه من الأفضب للجيش إنه يعترف إن اللي كانوا موجودين في الميدان دول ضباط منشقين
الاعتراف بالحق فضيلة
اللهم إني بلغت
اللهم اشهد