بياني للمجلس العسكري

أيوة هأكتب بيان... اشمعنى انتوا فالقينا بتسعين بيان لحد دلوقتي؟؟ أتمنى ربنا يقدرني وأقولهالكوا كلمة حق وجها لوجه وأموت بعدها

بصوا بقى...

بقالنا 60 سنة مستحملينكم... 60 سنة شايلينكم على رأسنا... 60 سنة معاكم على الحلوة والمرة... 60 سنة زي الست الغلبانة اللي بتصرف على البيت وجوزها الحشاش بيسرق الفلوس منها ويضربها هي والعيال.... أيوة انتوا شبه الراجل الحشاش!!

في 1952 عملتوا انقلاب وشلتوا ملك ظالم وفاسد زيكم... قلتوا على نفسكم حركة الجيش المباركة وجدي وجدتي خرجوا في الشارع ورفعوكوا فوق راسهم وعملوكوا أبطال واتكرمنا عليكوا وقلنالكوا ثورة....

في 1954 انقلبتوا على الديمقراطية وقلنالكوا ماشي بنحمي الثورة من أذناب النظام الملكي...

في 1956 وقفت المقاومة الشعبية معاكوا كتف بكتف في السويس وبورسعيد وعدينا المحنة...

في الستينات عذبتوا واعتقلتوا معارضينكم والشعب قال معلش لا صوت يعلو فوق صوت المعركة...

استحملنا غباؤكم السياسي في 1967 وطبطبنا عليكوا في هزيمتكوا وربطنا الحزام ست سنين..

أبويا وأمي خرجوا في الشوارع يهتفوا لكبيركم ومعلمكم وقالوله متمشيش احنا عايزينك..

في 1973 انتصرتوا ومن ساعتها وانتوا فوق الدولة وفوق القانون وبمزاجنا وعلى رأسنا من فوق عشان الحروب اللي خضتوها..

ومن ساعتها... 38 سنة وانتوا بتغرفوا من خير البلد دي..

38 سنة ليكوا أحسن امتيازات.. بتتحكموا في أكتر من 40% من الاقتصاد المصري باقتصادكم ومشاريعكم وفلوسكم ومصانعكم وكله من ميزانية الدولة..

ليكوا أحسن مستشفيات وأحسن فنادق وأحسن نوادي... وعمالنا الغلابة بيشتغلوا بالسخرة في المصانع اللي بقت بتصنع بوتاجازات وحلل بدل الدبابات...

60

سنة دخلتونا في حروب ملهاش معنى... ووقعتونا على معاهدات سلام برضوا ملهاش معنى... وسبتونا بعدها فريسة لشلة حرامية 30 سنة بينهشوا في لحمنا وانتوا كنت بتلموا معاهم الغنيمة من سكات...

وقامت ثورتنا.... وفي 28 يناير... منزلتوش تحموا الميدان.. نزلتوا تحموا معقل مبارك الأخير... ماسبيرو.. عشان عارفين لو الثوار وصلوله والقوا بيان الثورة منه كان خلاص الليلة خلصت.. بس انتوا لعبتوها صح.. خفتوا لأحسن نعمل زي ما عملوا معلمينكم في 1952....

حميتوا ماسبيرو وسبتوا البلطجية بيرتعوا في كل حتة..

وفي موقعة الجمل سبتوا الجمال تعدي.. كل ده واحنا بنبوس ونحضن فيكوا... ونستجديكوا ونقول الجيش والشعب إيد واحدة ونتصور جنب الدبابات وولادنا معاكم بيتصورا..

نمنا تحت المدرعات عشان متحركوش المدرعات جوة الميدان...

ولما عرفتوا ميزان القوة في صالحنا...حميتوا كبيركم وحميتوا نفسكوا... خليتوه يتنحى وبقيتوا بتاخدوا أوامركم منه....

عملنا نفسنا غلابة وقلنا خلاص مش مهم تاريخهم مع مبارك أكيد حسوا بالبلد.. أكيد هيستجدعوا معانا زي ما جدودنا استجدعوا معاهم 1952...

في 25 فبراير سحلتوا العيال وضربتوها وحبستوا عمرو البحيري وحاكمتوه ورجعتوا اعتذرتوا وقلتوا معلش الرصيد يسمح وقلنا ماشي ومالو منتوا شحتنوا الكارت لينا ب200 جنيه في11 فبراير...

في 9 مارس ضربتوا الشباب وعذبتوهم وسحلتوهم في سلخانة المتحف وحكمتوا عللى العيال بالعسكري وكشفتوا على عذرية البنات...

في 9 أبريل سجنتوا رجالتكوا الشرفاء اللي فيكوا وقتلتوا علي ماهر..

وفي 51 مايو ضربتوا العيال وركعتوهم وقلتولهم علم اسرائيل مش هينزل وضربتوا عاطف يحيى بالنار في مخه وفضل بين الحيا والموت 5 شهور لغاية ما استشهد...

في 28 يونيه أطلقتوا علينا كلاب الداخلية وحكمتوا على سامبو ظلم 5 سنين

وفي يوليو وقعتوا بينا وبين أهلنا في العباسية ومات محمد محسن..

وفي أغسطس وفي أول يوم رمضان فضيتوا الاعتصام ودخلتوا جامع عمر مكرم بجزمكم ودنستوه.. وضربتوا أهالي الشهدا...

وفي سبتمبر سبتوا الشباب الغضبان يقتحم السفارة وقبضتوا على 200 شاب عشوائيا عشان اسيادكم في اسرائيل يرضوا عليكم وقتلتوا 

تلاتة...

وفي اكتوبر دهستوا الأقباط الغلابة بمدرعاتكم.. وافتريتوا عليهم وقبضتوا على علاء عبد الفتاح و29 شاب معاه ظلم

وفي نوفمبر سبتوا كلابكم علينا تاني في محمد محمود واستشهد عشرات وعيون الشباب راحت

وفي ديسمبر سحلتوا اختي وعريتوها.. وقتلوتوا الشيخ الجليل.. والطبيب الشاب.. والشاب الغلبان..

كل شهر دبحتونا... سنة كاملة كل شهر مجزرة...

كفاية بقى... كفاية.. لقد هرمنا..

استحملناكم 60 سنة ومطمرش فيكم..

مش هنتعري تاني.. دمنا مش هيروح هدر تاني...

بحق كل نقطة دم نزلت من شهيد..

بحق كل دمعة ذرفتها الأم على ابنها

بحق كل ثانية قضاها معتقلين في سجونكم..

بحق كل فقير مات من الجوع وانتوا بتغرفوا من خير مصر..

بحق شرف سميرة اللي ضاع.. بحق شرف اختي اللي اتعرت..

بحق الآلاف اللي بيتحاكموا عسكري في سجونكم..

بحق سجنة علاء عبد الفتاح اللي مشافش ابنه وهو بيتولد..

بحق دولة الظلم اللي بنيتوها على رأسنا 60 سنة من دمنا وكرامتنا..

هيسقط حكمكم...

وهأشوفكم بتتعدموا واحد واحد في التحرير..

أموت وأشوفكم واحد واحد وأقولكم الكلمتين..

أجاهد وأقول كلمة حق عند سلطان جائر..

"وليعلم الذين ظلموا أي منقلب ينقلبون"

اللهم اجعل دماء شهدائك وعرض إمائك لعنة على الظالمين..

رفعت الأقلام وجفت الصحف..