أيوان... زي ما قريتو في العنوان كده... هادافع عن سواقين الميكروباص والبلطجية اللي أنا نفسي مفقوعة من تصرفاتهم
بس هادافع عنهم .....عشان معنديش استعداد افقد احترامي لنفسي
عاوزين تعرفوا الموضوع إيه؟؟
لو سمحتوا اقروا الحوار ده اللي جرى بيني وبين أحد الأشخاص على تويتر
عمو البرجوازي: أنا أشك إن فيه شعب أوسخ من شعب مصر باستثناء المحترمين لكن الغالبية أوساخ
أنا: وأنت بقى من المحترمين؟؟
عمو البرجوازي: آه الحمد لله
أنا: مع كامل احترامي... عمري ما شفت محترم ينعت شعبا بأكمله بالوساخة!!
عمو البرجوازي: أنا قلت مع احترامي للمحترمين بس انتي انزلي الشارع وهتقابلي أوساخ أكتر من المحترمين
أنا: لما تقابل ال 80 مليون واحد وتلاقي الأوساخ أكتر من المحترمين تبقى ساعتها تقول اللي انت عاوزه
عمو البرجوازي: طيب ما هو طبيعي لما تقابلي المحترمين الأقل في الشارع يبقى المش محترمين أكتر.. عمتان أنا آسف لو كنت ضايقتك!!!
أنا: مش ضروري.. كمان تعريف المش محترم والمحترم من وجهة نظرك ممكن ميكونش هو نفس التعريف من وجهة نظر حد تاني ... الفكرة اني مش بحب حد يعيب في ولاد بلدي مهما كانت الاعتراضات... كفاية اللي هما عاشوه.. اديهم حياة كريمة وبعدين حاسبهم...
عمو البرجوازي: فيه طبقة (خدو بالكوا من كلمة طبقة دي) حتى لو اديتيها حياة كريمة طباعهم مش هتتغير... يعني لو سواق الميكروباص لو بقى عنده عربية ولا تاكسي سواقته هتتغير؟؟
أنا: ده تفكير طبقي وعنصري من الطبقة الأولى.. أنا فعلا مصدومة وأرفض الدخول في حوارات من هذا النوع!! قبل ما تحاسبهم على الداء اعرف سببه الأول... رجع دولة القانون وبعدين حاسبهم.. سواء كانوا اغنيا او فقرا.. دكاترة أو سواقين ميكروباص!!!
عمو البرجوازي: على فكرة أنا أهلي من الطبقة المتوسطة ومش بتكبر ولا حاجة الحمد لله!!!
أنا: وكونك من الطبقة المتوسطة ده يخليك تحس بالناس أكتر مش تتكبر عليهم... كأنك بتقول سواق الميكروباص جينيا مش محترم ودي قمة العنصرية!!!!
وانتهت المناقشة يا سادة بعد تدخل أحد الأصدقاء المحترمين لتلطيف الأجواء قبل ما يتحول الموضوع إلى إطلاق نيران متبادل من الطرفين!!
أولا أنا بعتذر على نقل الحوار ده من مجال شخصي على تويتر إلى مجال عام... بس أنا حبيت أستخدم المثال ده عشان أرصد ظاهرة غريبة بقيت متنامية جدا في الفترة الأخيرة وسمعتها بشكل كبير خاصة داخل الطبقة المتوسطة بحكم تفاعلي مع الناس في الشارع كصحفية
على فكرة أنا بحاول تجنب التعميم بقدر المستطاع وأكيد مش كل الطبقة المتوسطة كده... بس دوري كصحفية بتعامل مع المصريين من مختلف الطبقات اني ارصد لكم بعد الظواهر اللي بدأت تظهر بين الناس
لهجة تعالي وعنصرية وبرجوازية شديدة في التعامل مع الفقراء والمهمشين
وظهرت بشكل غريب في حادثة مقتل سائق الميكروباص أمام أو داخل قسم الأزبكية
لو اللي قتل الراجل ده ضابط فهذه كارثة أن تحدث بهذا الشكل بعد 25 يناير
ولو الأهالي ضربوا هذا الرجل حتى الموت فهذا هو إعصار تسونامي الكارثي الأكبر
بغض النظر عن تطاول هذا الرجل على مأمور القسم وهي جريمة يعاقب عليها القانون
هل ينفع ان ده يكون مبرر لضربه حتى الموت؟؟
لو الراجل ده كان راكب عربية ملاكي شيك مش ميكروباص... كانت الناس ضربته؟؟
لما ألاقي واحد بيعلق في جروب "كلنا خالد سعيد" على الموضوع وبيقول "إيه يعني يا جماعة ده سواق ميكروباص مش دكتور يعني ما يموت واللا يغور في ستين داهية" والاقي 12 واحد عاملين لايك على التعليق يبقى احنا أمام ظاهرة مرعبة!!
لما الاقي واحد تاني بيقول "لا يوجد مصري غير معترف بانتشار البلطجية ومطلوب نم الشرطة معاملة الشعب المصري كله بطريقة انسانية.. هل البلطجية يعاملون الشعب بطريقة انسانية لنطلب من الشرطة معاملتهم بطريقة انسانية؟؟ النتيجة ان الشرطة مش عارفة تتعامل معاهم ... المرجو نسيان حقوق الانسان شوية بالنسبة للبلطجية علشان الشرطة تعرف تشوف شغلها ونخلص منهم.. هذا بالنسبة للبلطجية فقط لا غير"!!!!
لا معلش... الكلمة اسمها "حقوق انسان" مش حقوق الانسان ما عدا سواقين الميكروباص والبلطجية...
يعني على كده لو الشهيد خالد سعيد الله يرحمه كان سواق ميكروباص مكناش عبرناه لول ببصلة بقى؟؟
على فكرة أنا بركب ميكروباصات كتير... عشان محدش يقول دي بنت فافي
على فكرة أنا اتنشلت محفظتي من واحدة بياعة في المترو... وإلى الآن زعلانة على محفظتي اللي تعبت أوي عشان أعمل كل الأوراق اللي فيها.... وعانيت زي كل المصريين من الانفلات الأمني..
بس –والله على ما أقول شهيد- أنا مستعدة أموت في سبيل الدفاع عن حق هذه النشالة في محاكمة مدنية علنية عادلة...
ال40% اللي تحت خط الفقر هما الناس دول...
سواقين الميكروباص والبلطجية والنشالين اللي مش عاجبيننا
هما دول ضحية المجتمع اللي فضل ساكت 30 سنة
هما اللي لما خرجوا لقوا نفسهم عايشين 10 في أوضة واحدة
هما دول اللي المدرس اللي في الحضانة ضربهم وعدمهم العافية
هما دول اللي سابوا المدرسة في ابتدائي عشان يشتغلوا ميكانيكية وسواقين ميكروباص
هما دول اللي صاحب العربية اللي شغالين عليها بيبهدلهم كل يوم
هما دول اللي الضابط في القسم بيمسح بكرامتهم الأرض كل يوم
ليه ممكن يحترمونا لما هما نفسهم ملقوش اللي يحترمهم
مش من حقنا نلومهم لما يتنططوا علينا في المواقف
مش من حقنا نضربهم حتى الموت
مش من حقنا نقبل الإهانة في حقهم لمجرد انهم مش عاجبينا
نطالب بمحاكمتهم أيوة... ونطبق عليهم القانون أيوة
بس لازم نرجع لهم احساسهم بكرامتهم
كلنا زعلنا على الثوار اللي بيحاكموا محاكمة عسكرية وبيصدر عليهم الاحكام في 3 أيام
بس نسينا البلطجية اللي عددهم زاد عن ال7 آلاف اللي كمان بيتحاكموا محاكمة عسكرية
والمصيبة لما الاقي عضو في المجلس القومي لحقوق الانسان –بدون ذكر أسماء ضياء رشوان- بينادي بتطبيق الأحكام العرفية
لمجرد انهم بلطجية
لا معلش
حتى البلطجي ليه الحق في محاكمة مدنية علنية عادلة
مبارك متهم بقتل 850 من الثوار
هاتولي بلطجي أو مسجل خطر في مصر متهم بقتل واحد على عشرة من الناس دي
يعني بالأرقام مبارك هو أكبر بلطجي في مصر
مبارك ثروته تقدر بنحو 70 مليار
هاتولي نشال معاه 10 جنيه من المبلغ ده
يبقى مبارك برضه بالأرقام أكبر نشال في مصر
بس برتبة رئيس جمهورية مخلوع والقائد الأعلى للقوات المسلحة السابق
وطالما متفقين ان مبارك لازم يتحاكم محاكمة مدنية علنية عادلة
يبقى كمان كل البلطجية وسواقين الميكروباص يتحاكموا بنفس الشكل
هو ده الحق الذي لا يتجزأ
الرأي العام المصري للأسف بيساند المحاكمات العسكرية للمدنيين ظنا منهم ان ده لاستعادة الامن
لا يا سادة
الحقيقة ده بيساعد على زيادة حالة الانفلات الأمني
لان زي ما قال الناشط والمحامي حسام بهجت في الشروق ده هيفقد المواطنين الثقة في قوة وعدالة القضاء المدني
وبالتالي تضيع هيبة القانون
مينفعش انسان –مهما كان جرمه- يتقبض عليه ويتحقق معاه ويحاكم في 3 أيام من غير حتى م يستدعي محاميه
زي ما مش عاجبنا "الاعتصامات الفئوية" بتاعت العمال "ياي بقى مستوى يععع يعني"... مينفعش ندعم مشروع القانون الذي يقر برفع المسئولية الجنائية عن المتهمين في قضايا فساد والاكتفاء باستعادة الاموال... لتشجيع الاستثمار
يعني يا حرامي اسرق براحتك ولما تنكشف ان شاء الله حانقولك هات شوية الفلوس اللي انت اخدتهم وكخة عيب متعملش كده تاني
لكن العامل الغلبان اللي مرتبه 400 جنيه نطبق عليه قانون تجريم الاعتصام ويتحاكم عسكري كمان عشان بيدمر الاقتصاد وعجلة الانتاج اللي كانت بتجري رهواااان قبل الثورة وجات الثورة عطلتها...
أيه التناقض ده؟؟
لهذه الدرجة وصلت بينا الطبقية والتناقض؟؟
للدرجة حياة الانسان رخيصة لمجرد إنه من طبقة أقل
يا جماعة أنا مش بتكلم عن الصراع التقليدي ما بين البرجوازيين والبلوريتاريا
أنا بتكلم عن نظرة طبقية خطيرة أصبحت بتنمو في الطبقة المتوسطة
الطبقة الأكثر تفاعلا مع مشاكل المجتمع
الطبقة اللي بكرة هيخرج منها رئيس الجمهورية والوزير والعالم والقاضي
أبا الحاج كارل ماركس لو كان عايش وشاف المصيبة دي كان زمانه ولع في كتبه كلها وبعدين ولع في نفسه
من الآخر بقى
احنا في مرحلة انتقالية وطالبين من ربنا يباركلنا في بلدنا عشان نعدي على خير
وعمر ما ربنا حيباركلنا في البلد دي لو بات فيها الغلبان مظلوم
حتى لو كان بلطجي أو سواق ميكروباص
هنطبق عليهم القانون
وهيتحاكموا
بس بالعدل
زي ما مبارك بيتحاكم بالعدل
وافتكروا
"وايم الله لو أن فاطمة بنت محمد سرقت لقطعت يدها"
على فكرة
نسيت أقولكم
عمو البرجوازي ده من ثوار 25 يناير.. وكان في الميدان من أول يوم
وأول هتاف قاله كان:
عيش
حرية
عدالة اجتماعية
عدالة اجتماعية يا مصريين
وسلملي على الثورة
